hurrengoa
ahatea beijing erara roast duck    Antzinatik ezagutzen dira ahatearekin eginiko errezetak Txinako hainbat eskualdetan, baina Ming dinastiaren amaierara arte ez zuen bere agerpena egin ahate lakatuak. Jauregian aurkeztu zenean, berehala bihurtu zen enperadore guztien kuttuna. Ahateak lakatzearen teknika txerrikumearen erretze teknikatik dator. Azken mende honetan, sukaldari espezializatuen erronka izan da ahatearen azala leun eta era berean kraskatua lortzea, ahoan desegiteraino. Gauza asko izan behar dira kontuan ahate lakatua Beijing erara prestatzeko: ahatearen kalitatea, baba beltza saltsa, tipulatxo txinatarrak, pepinoak, taloak egiteko erabiltzen den irina, erretegian erabiltzen den egur mota (fruitu arbolak izaten dira, udareondoak eta mertxikondoak nagusiki, oso garrantzitsua baita egur erreak ematen dion fragantzia). Beijingeko kanpoaldean, ahate haztegi espezializatuek 11 hilabetetan hazi egiten dituzte, eta 2,5 kilo dituztenean sakrifikatu.

Ahatea mahai albora atera ohi da, osorik, eta, bertan, sukaldariak, zirujau baten moduan, ebaketa prozesua hasten du. Maisu sukaldariek 200 haragi eta azal lamina ateratzen diote ahate bakar bati. Haragi zatiak plateraren behealdean jartzen dira, eta azala, gutizia bat dena, gainean. Azalaren zaporea indartzeko, sesamo olioan edo azukre saltsan busti eta zuzenean jaten da. Bestetik, haragia baba beltz saltsarekin bustitzen da, eta, tipula xehatu eta kalabazin finarekin nahasturik, irin talo batean jarrita jaten da. Beijinera bazatoz, derrigorrez frogatu behar duzu ahate lakatua. Badira egunero 2.000 ahatetik gora zerbitzatzen dituzten jatetxeak. Ahatea Beijing erara prestatzen zuen
lehendabiziko jatetxea ireki zenetik, 600 urte baino gehiago igaro dira. Egun, Txinako sinbolo nazionalen artean goxoena da, inongo zalantzarik gabe.